கதைக்கு முன்..
இது போன்ற கதைகள் நிறைய எழுதப்பட்டிருக்கிறது. இது என்னுடைய முயற்சி.
இனி கதை..
சில மைக்ரோ செகண்டுகளில், தூங்கிக்கொண்டிருந்த நியுரான் செல்கள் விழித்தன.
மூளையில், படுவேகமாக கான்ஸியஸ் வந்தது.
நான்..
கணேஷ்..
சனிக்கிழமை..
லீவு..
அவன் தூக்கத்திலிருந்து கண் விழித்தான்.
காலண்டரில் வெள்ளிக்கிழமை என்று காட்டியது.
எழுந்திருக்க சோம்பலாகத்தான் இருந்தது. இருந்தும் கட்டிலிலிருந்து இறங்கி, காலண்டரில் தேதியை கிழித்தான்.
வீட்டுக்குள் இருந்து அம்மாவின் சத்தம் கேட்டது.
"கிருஷ்ணா, எந்திருச்சிட்டியா! "
அவனுக்கு ஒன்றும் புரியவில்லை. யார் கிருஷ்ணா?
ரூமுக்குள் வந்த அம்மா, "கிருஷ்ணா, டீ வேணுமா " என்றாள்.
யாரும்மா கிருஷ்ணா?
நீதான்டா, என்ன பேர் மறந்திடுச்சா?
“அம்மா! நான் கணேஷ்மா”, திகைப்போடு கத்தினான்.
“என்னடா ஆச்சு! டீ வேணுமா? வேணாமா?” என்று கேட்டுவிட்டு, திரும்பி உள்ளே சென்றுவிட்டாள்.
அவனுக்கு ஒன்றுமே புரியவில்லை. அம்மா சம்பந்தமில்லாமல் என்னை கிருஷ்ணா என்று கூப்பிடுகிறாள். அப்பா வேறு ஊரில் இல்லை.
அம்மா பின்னாடியே சென்றான்.
அம்மா! அம்மா! என்று கத்தினான்.
உனக்கு என்னடா ஆச்சு!
எம்பேரு கணேஷ்மா!
உனக்கு மொட்டை அடிச்சு காது குத்தின எனக்குத் தெரியாதாடா?. உனக்கு என்னடா வேணும்.
யாரும்மா கிருஷ்ணா! எனக்கு கணேஷ்னு தாம்மா பேர் வச்சீங்க!
ஆமான்டா! எங்க வீட்டுல உனக்கு கணேஷ்னு தான் பேர் வைக்கனும்னு சொன்னாங்க. யார் கேட்டாங்க? உன் பாட்டி
கிருஷ்ணானு தான் பேர் வைப்பேன்னு அடம் பிடிச்சாங்க!
“அது மட்டுமா", என்று மீண்டும் ஆரம்பித்த அம்மா முகம் மாற ஆரம்பித்தது.
உங்க மாமா, தோடுக்கு ஒரு பவுனுக்கு பதிலா அரைப்பவுன் போட்டதுக்கு சண்டை போட்டாங்களே அதை மறக்கவா முடியும். யாராவது ஒரு பவுனுல பெரிய தோடா போடுவாங்களா. உன் சின்ன காது என்னாகிறது?
இதற்கு மேல் அம்மாவிடம் பேச முடியாது, என்று திரும்ப அவன் ரூமுக்கு வந்தான்.
அம்மாவுக்கு என்னமோ ஆயிடுச்சு.
தயாளனை கூப்பிடலாம். குப்பையாக கிடந்த கம்பயூட்டர் டேபிளில் இருந்து செல்போனை எடுத்து கால் பண்ணினான்.
ரிங் போய்கொண்டிருந்தது. இன்னும் தூங்கிக்கொண்டிருக்கிறான்.
ரிங் சத்தம் நின்று, அவனுடைய தூக்கக்குரல் கேட்டது.
"என்னடா கிருஷ்ணா"
ஒன்றும் புரியவில்லை. தயாளனும் என்னை கிருஷ்ணானு கூப்பிடுறான். எல்லாருக்கும் என்ன ஆச்சு!
"தூங்கிட்டிருக்கிறயா, அப்புறம் கூப்பிடறண்டா", காலை கட் பண்ணினான்.
டேபிள் மேலிருந்த பேங்க் பாஸ் புக்கை எடுத்துப் பார்த்தான். அதிலும் கிருஷ்ணா என்று இருந்தது.
இது என்ன குழப்பம்.
பக்கத்திலிருந்த புத்தகங்களை எல்லாம் எடுத்துப்பார்த்தான்.
எல்லாவற்றிலும் கிருஷ்ணா என்று எழுதியிருந்தது.
பர்ஸிலிருந்த ஏ.டி.எம் கார்டு
டிரைவிங் லைசன்ஸ்
டிரைன் சீசன் டிக்கெட்
எல்லாவற்றிலும் கிருஷ்ணா!
அவனுடைய காலேஜ் சர்டிபிகேட்,
பிளஸ் டூ மார்க் சீட்
டென்த் மார்க் சீட்
அவனுக்கு கிடைத்த கிரீட்டிங் கார்ட்ஸ்
எல்லாவற்றையும் பார்த்தான். கிருஷ்ணா என்றுதான் இருந்தது.
அவன் பெயர் கணேஷ் என்பதில் சந்தேகமில்லை.
ஆனால் எப்படி எல்லவற்றிலும் கிருஷ்ணா என்று இருக்கிறது.
அம்மாவிடம் கூட எதுவும் சொல்லவில்லை.
தயாளன் போனில் கூப்பிட்டான். பதினோரு மணிக்கு காபி டேவுக்கு வருவதாக சொன்னான்.
தினேஷும் வருவான்.
அந்த பிரச்சினையை நேரில் சொல்வது என்று முடிவெடுத்தான்.
காபி டே, பதினொன்றரை மணியளவில்..
தயாளனும் தினேஷும் எதிர் டேபிள் அழகான பெண்ணை பார்த்துக்கொண்டிருந்தார்கள்.
"டேய்! நான் சொல்றதை கேட்கப்போறீங்களா, இல்லையா?" பொறுமையிழந்து கத்தினான்.
தயாளன் கேட்டான், "உனக்கு என்னதான்டா பிரச்சினை".
தினேஷ் இரண்டு பேரையும் பார்த்துவிட்டு, மீண்டும் அந்த பெண்ணை வேடிக்கை பார்க்க ஆரம்பித்தான்.
அவன் காலையிலிருந்து நடந்த எல்லாவற்றையும் சொன்னான்.
" எங்களுக்கு எந்த சந்தேகமுமில்லை, நீ கிருஷ்ணாதான். நைட்டு சரக்கு ஓவராயிடுச்சா!", தயாளன் கிண்டலடித்தான்.
“நான் கணேஷ்தான்டா. உங்க எல்லோருக்கும் என்ன ஆச்சு!”
"நீ கணேஷ்தான்", தினேஷ் சிரித்தபடியே சொன்னான்.
"பேரலல் யுனிவர்ஸ் பத்தி சொல்லியிருக்கிறேன் ஞாபகமிருக்கா"
"ஆரம்பிச்சிட்டான்" தயாளன் முனுமுனுத்தான்.
ஆனாலும் அவன் சீரியஸாக கவனித்தான்.
"அதாவது நார்நியா படத்தில வர மாதிரி இன்னொரு உலகம் நம்ம உலகத்திலயே இருக்கிறது ஒரு கான்சப்ட்.
இன்னொரு கான்சப்ட்.. ஒவ்வொரு சாய்ஸுக்கும் ஒரு பேரலல் யுனிவர்ஸ் இருக்கும்.
அதாவது இன்னொரு யுனிவர்ஸுல உங்க அம்மா நினைச்சபடி உனக்கு கணேஷ்னு பேர் வச்சிருப்பாங்க.
அதான் நீ.
ஆனா தூங்கி எந்திரிச்ச போது இந்த யுனிவர்ஸுக்கு வந்துட்ட." தினேஷ் பேசி முடித்தான்.
அவனுக்கு ஒன்றும் புரியவில்லை. புரிந்த மாதிரியும் இருந்தது.
தயாளன் எதுவும் பேசாமல் இருந்தான்.
வீட்டிற்கு வந்து பேரலல் யுனிவர்ஸ் பற்றி இன்டர்நெட்டில் படித்துப் பார்த்தான்.
எல்லாம் சரி. இது எப்படி சாத்தியம்!
நான் கணேஷ்தான். தூங்கி எந்திரிச்சதிலிருந்து எல்லாமே மாறியிருக்கிறது.
தூக்கத்தில் ஏதாவது பிரச்சினையா?
கூகிளில் ஸ்லீப்பிங் பிராப்ளம் என்று தேடிப்படித்தான்.
சரியான தூக்கமில்லாததால் மனிதனின் மனநிலை பாதிக்கப்படலாம். ஆழ்ந்த தூக்கத்திலிருந்து சட்டென்று விழிக்கும் போது குழப்பம் சோம்பேறித்தனம் நிலை ஏற்படும்.
ஸ்லீப் இனெர்டியா (Sleep inertia*) என்ற பாதிப்பு 4 மணி நேரம் வ்ரை இருக்கலாம். நல்ல ஆழ்ந்த தூக்கத்திலிருந்து விழிக்கும் போது பாதிப்பு கடுமையாகவும் பல மணி நேரம் தொடரலாம்.
படித்தவுடன், அவனுக்கு பயமாகத்தான் இருந்தது. நாளைக்கும் இப்படியே இருந்தால் டாக்டரை பார்க்கலாம்.
சீக்கிரமாகவே படுக்கைக்கு சென்றான். அலுப்பில் உடனடியாக ஆழ்ந்து தூங்கினான்.
காலை..
சில மைக்ரோ செகண்டுகளில், தூங்கிக்கொண்டிருந்த நியுரான் செல்கள் விழித்தன.
மூளையில், படுவேகமாக கான்ஸியஸ் வந்தது.
நான்..
கிருஷ்ணா..
அவன் தூக்கத்திலிருந்து கண் விழித்தான்.
என் பேர் கிருஷ்ணாதான். நேற்று நடந்ததெல்லாம் கனவு போல் இருந்தது.
ஆனாலும் சந்தோஷமாக இருந்தது.
"கிருஷ்ணா.. கிருஷ்ணா..
என் ஃபேவரிட் காட் நீதான் கிருஷ்ணா" சத்தமாக பாடினான்.
வீட்டுக்குள் இருந்து அம்மாவின் சத்தம் கேட்டது.
"கணேஷ், எந்திருச்சிட்டியா! "
*Some sleep disorders are serious enough to interfere with normal physical, mental and emotional functioning.
Sleep Inertia
Sleep inertia refers to the feeling of grogginess most people experience after awakening. Sleep inertia can last from 1 minute to 4 hours, but typically lasts 15-30 minutes. During this period, you are at a reduced level of capacity and may have trouble doing even simple everyday actions.
If someone has been very sleep deprived or has been woken from a deep sleep stage, the sleep inertia can be more severe than normal and may take longer to overcome.
